-
Hou jou rekenaar skoon van virusse, sodat jou
vriende se eposadresse nie gesteel en misbruik kan word nie.
-
Moenie talle eposadresse oop en bloot in die "To.."
of "Cc.." voeg nie. Dit lei tot die misbruik van eposadresse.
As dieselfde boodskap dan aan onverwante ontvangers moet gestuur
word, plaas die ontvangers se adresse in die "Bcc" (Blind Copy)
sodat hulle nie mekaar se adresse kan sien nie. Ontvangers wie se
masjiene met virusse besmet is, kan dan ook nie eensklaps nog 'n
rits nuwe eposadresse laat insamel nie.
-
Moenie 'n eposantwoord onder aan die gestuurde teks
gee nie. Plaas die antwoord aan die bo-kant van die oorspronklike
boodskap, sodoende gaan antwoorde nie verlore nie en die ontvanger
hoef nie sy eie teks weer deur te lees om by jou antwoord uit te kom
nie.
-
Forwards, FORwards, FORWARDS, vir een en almal op
jou adreslys is tog so lastig en so "last century". As jy iets
belangriks het, sê dit in jou eie woorde of los dit!
-
Nuusbriewe het dalk nut vir jou en jou klein groepie
vriende by die werk, maar verveel net die res van jou vriendekring.
-
Gebruik "Reply to all" net indien dit absoluut nodig
en van toepassing is.
-
Moenie ALLES IN HOOFLETTERS TIK NIE. Dit lees
ongemaklik en nie net lyk dit asof jy skree nie, maar die ontvanger
kan dalk dink jy weet nie hoe om te tik of die "Caps Lock" af te
haal nie.
-
Saaklike en belangrike boodskappe moet liefs op
daardie wyse en op netjiese "eposskryfpapier" hanteer word. Die
boodskap gaan verlore en het minder inpak as die ontvanger tussen
talle hoppende hasies of kerjakkerende katjies deur moet waad om
inligting te probeer bekom. Die aandag kan gou afdwaal en die
oorspronklike boodskap is dan dalk verlore.
-
Rekenaars is nie almal dieselfde nie en hul
sagteware nog minder. Wees byvoorbeeld versigtig om emoticons en
eienaardige en uitsonderlike fonte te gebruik, want dit vertolk nie
altyd ewe maklik by alle werkstasies nie en jou boodskap kan dan
skeef gelees of verkeerd verstaan word. Epos se doel is tog eerstens
goeie kommunikasie.
-
Vermy groot eposstukke en as dit dan móét, breek die
boodskap op in dele. Breëband-diens is nie vir almal ewe toeganklik
nie en groot eposstukke neem lank om af te laai. Kwotas en
diensverskaffer-termes mag dalk ook 'n probleem wees vir sulke groot
eposstukke. Gebruik een van die toerits-programme om die eposstuk te
kompakteer en makliker aflaaibaar te maak.
-
RE: Is nie 'n antwoord nie. Gebruik die
onderwerpruimte beter deur 'n goeie titel te kies en dit vir jou
ontvanger makliker en aangenamer te maak om gou te sien waaroor jou
boodskap gaan.
Laaste maar nie die minste nie: Dink mooi voor jy die
"SEND" knoppie druk.
Epos kan nie juis "ontstuur" word nie.
